ಅಕ್ಕ...ನಮ್ಮ ಹಳೆ ನೆನಪು...

ಅಮ್ಮನಿ೦ದ ಬೆಳೆದೆವು ನಾವು ಎಲ್ಲಾ ಕಷ್ಟಗಳ ಮೆಟ್ಟಿ
ನಮಗಾಗಿ ಜೀವನದಲ್ಲಿ ಹೋರಾಡಿದ ಅವಳೆಷ್ಟು ಗಟ್ಟಿ
ಅವಳಿಲ್ಲದಿರೆ ಸಿಗುತಿತ್ತೇ ನಮಗೀ ಸುರಕ್ಷಿತ ಜೀವನ
ಅವಳಿಗೆ ಇನಿತು ಸುಖ ನೀಡಿದರೆ ಆಗಬಲ್ಲೆವೇ ಪಾವನ

ಇದೋ ಅಕ್ಕ೦ದಿರೆ ನಮ್ಮ ಹಳೆಯ ನೆನಪುಗಳ ಪಟ್ಟಿ
ಈ ನೆನಪುಗಳೆ ತಾನೆ ನಮ್ಮ ಜೀವನದ ಚಿನ್ನದ ಗಟ್ಟಿ
ಬರೆವಾಗ ನನ್ನ ಮನ ತು೦ಬಿ ಕಣ್ಣೀರಾಗಿ ಹೊರಬ೦ತು
ಅಹಾ ಬಹಳ ಚ೦ದ ನಮ್ಮ ಜೀವನದ ಮೊದಲ ಕ೦ತು

ಆಚೆಮನೆಯ ಜಗಲಿಯಲ್ಲೇ ನಾವು ಓದಿಬರೆದದ್ದು
ಸೊಳ್ಳೆಹೊಡೆದು ರಾಶಿಹಾಕಿ ಚಟ್ನಿ ಮಾಡಿದ್ದು
ಆಚೆಮನೆ ಹೊಸ ಟಿವಿಯಲ್ಲಿ ಏನೇ ಬ೦ದರೂ
ಕೂಗಿ ಕರೆದು ಆಶ್ಚರ್ಯದಿ೦ದ ನೋಡುತಿದ್ದೆವು ಎಲ್ಲರೂ

ಮನೆ ಹಿ೦ದಿನ ಗದ್ದೆಯಲ್ಲಿ ಜೋಡಿಬಲೆ, ಪಿಳ್ಚ೦ಡಿ ಆಟ
ಬೇಲಿ ಪೊದೆ ಮರದ ಹಿ೦ದೆ ಎಲ್ಲರ ಜೊತೆ ಅಡಗಿ
ಭಯವಿಲ್ಲದೇ ಕೂತು ಆಡಿದೆವು ಕಣ್ಣಾ ಮುಚ್ಚಾಲೆ ಆಟ
ತಡವಾದಾಗ ತಿನ್ನುತಿದ್ದೆವು ಅಮ್ಮನ ಕೋಲಿನ ಏಟ

ಆ ನಮ್ಮ ಕಬ್ಬಿಣದ ಪುಸ್ತಕ ಇಡುವ ಶೆಲ್ಫು ನೀಲಿ ಬಣ್ಣದ್ದು
ಅದರಲ್ಲೇ ತಾನೇ ನಮ್ಮ ನಮ್ಮ ಪ್ರಪ೦ಚ ಸೃಷ್ಟಿ ಮಾಡಿದ್ದು.
ಅಪ್ಪನ ಹೋಟೆಲಿನ ಮರದ ದೊಡ್ಡ ಕಪಾಟು ಚಾಪೆದಿ೦ಬುಗಳ ಛತ್ರ
ಪುಟ್ಟ ದೇವರಕೋಣೆಯಲ್ಲಿ ಶಿವಪಾರ್ವತಿಯ ಕುಟು೦ಬದ ಮುದ್ದುಚಿತ್ರ

ಮನೆ ಎದುರಿನಲಿ ನಾ ಬಾಬಕ್ಕನ ಬೀಳಿಸಿದ ತೆ೦ಗಿನಕಟ್ಟೆ
ನ೦ದಿಬಟ್ಟಲಿನ ಗಿಡದ ಪಕ್ಕದ ಕಲ್ಲಲ್ಲಿ ಒಗಿತಾಇದ್ವಿ ಬಟ್ಟೆ
ಎದುರಿನ ನೀರಿನ ಟ್ಯಾಪೇ ಆಸರೆ ತು೦ಬಲು ನಮ್ಮ ಟ್ಯಾ೦ಕು
ಆಚೆಮನೆ ದೊಡ್ಡ ಕಿರುಚ್ತಾಇದ್ರು ಕಾಲಿಯಾದ೦ಗೆ ನೀರಿನ ಬ್ಯಾ೦ಕು

ಏನೇ ಖುಶಿ ಪಟ್ಟರೂ ಸ೦ಜೆ ಅಪ್ಪ ಬರುವತನಕ ಮಾತ್ರ
ಆಮೇಲೆ ಅವರ ಸಿಟ್ಟಿಗೆ ಹೆದರಿ ನನಗೆ ಬರುತಿತ್ತು ಮೂತ್ರ
ಅವರು ಉಳಿಸಿ ತರುತಿದ್ದ ತಿ೦ಡಿಗಾಗಿ ನಮ್ಮ ಜಗಳ
ಹೆಚ್ಚೆಲ್ಲ ವಿಜ್ಜಿಗೇ, ಅಪ್ಪ ಬಿಟ್ಟು ಕೊಡ್ತಾರೇ ಪ್ರೀತಿಯ ಮಗಳ

ಊಟದ ಸಮಯ ಆ ಚಿಕ್ಕ ಅಡುಗೆ ಮನೆಯಲ್ಲಿ ನಮ್ಮ ವಾಸ
ತಿನ್ನುತಿದ್ದೆವು ಹ೦ಚಿಕೊ೦ಡು ಸಹಿಸಿಕೊ೦ಡು ಅಪ್ಪ ಬಿಟ್ಟ ಹೂಸ
ಮಲಗುತಿದ್ದೆವು ಎಲ್ಲ ಕಡ್ಡಿಗಳ೦ತೆ ಅದೇ ನಮ್ಮ ಬೆ೦ಕಿಪೆಟ್ಟಿಗೆ
ಬರುತಿತ್ತು ನಿದ್ದೆ ಸುಖವಾಗಿ ದಿ೦ಬು ತಲೆಗೆ ತಾಗಿದ ಪೆಟ್ಟಿಗೆ

ಶಿವರಾತ್ರಿ, ಕೃಷ್ಣಜನ್ಮಾಷ್ಟಮಿಗಳಲ್ಲಿ ಅಪ್ಪನ ಪೂಜೆ ದೊಡ್ಡದು
ಬೇಗ ಮುಗಿದರೆ ಸಾಕು ಬೇಡುತಿದ್ದೆವು ನಾವು ದೇವರ ಹಸಿದು
ಪೂಜೆಗೆ ಅಮ್ಮ ಮಾಡಿದ ರುಚಿಯಾದ ಅವಲಕ್ಕಿ ಪಾಯಸ
ಬಿಡ್ತಾ ಇರಲಿಲ್ಲ ನಾವ್ಯಾರೂ ತಟ್ಟೆಲಿ ಊಟದ ಲವಲೇಶ

ಅಪ್ಪನ ಹಳೇ ರೇಡಿಯೊದಲ್ಲಿ ಕೇಳುತಿದ್ದೆವು ಹಾಡುಗಳನ್ನ
ಶಾಲೆಗೆ ಹೊರಡಲು ತಿನ್ನುತಿದ್ದೆವು ಮೊಸರು ತ೦ಗಳನ್ನ
ಎಷ್ಟು ಚೆ೦ದ ಅರೆವಕಲ್ಲಿನಲಿ ಅಮ್ಮ ಹಿಟ್ಟು ಅರೆವ ಸದ್ದು
ತಪ್ಪಿಲ್ಲದೆಯೂ ಸಿಟ್ಟಲ್ಲಿ ಅಪ್ಪ ಕೊಡ್ತಾ ಇದ್ರಲ್ಲಾ ಗುದ್ದು

ನಾಗರಪ೦ಚಮಿಗೆ ಅಮ್ಮ ಮಾಡೋಳು ಹಾಲುಬಾಯಿ
ಅಷ್ಟಮಿಗೆ ಬರ್ತಾಇತ್ತು ಹ೦ಗಾರ್ಕಟ್ಟೆ ಚಕ್ಕ್ಲಿತೆ೦ಗಿನಕಾಯಿ
ಬರುತಿದ್ದೆವು ಹೆಮ್ಮೆಲಿ ನಾವು ಚೌತಿಯ ಹೆಚ್ಚಿನ ಸ್ಪರ್ಧೆ ಗೆದ್ದು
ತಿ೦ದು ಹೊಟ್ಟೆಲಿ ಹುಳ ಆದ್ರೆ ಕಿರಾತಕಡ್ಡಿ ಕಷಾಯವೇ ಮದ್ದು

ದೀಪಾವಳಿಗೆ ಅಕ್ಕಪಕ್ಕದ ಮನೆಯ ಪಟಾಕಿಯ ನೋಟ
ತುಳಸಿಪೂಜೆಗೆ ಅಮ್ಮನ ಸಿಹಿ ದೋಸೆ ಅವಲಕ್ಕಿಯ ಊಟ
ಸ್ಕೂಲ್ ಡೇಗೆ ಲಕ್ಷ್ಮಿನಾರಾಯಣ ಭಟ್ಟರ ನಾಟಕದ ತಯಾರಿ
ಜನರು ನೋಡಿ ಹೊಗಳುತಿದ್ದರು ನಮ್ಮ ಕಲೆ ನಟನೆಯ ಪರಿ

ವರುಷಕೊ೦ದು ಬರುತಿತ್ತು ಕಡಿಯಾಳಿ ಶಾಲೆಯಲಿ ಟ್ರಿಪ್ಪು
ಆದರೆ ಹಣವಿಲ್ಲದೇ ಆಗ್ತಾಇತ್ತು ಟ್ರಿಪ್ಪಿನ ಪ್ಲಾನು ಡ್ರಾಪು
ರಜೆಯಲಿ ಪುಸ್ತಕಗಳ ರಟ್ಟಿನ ಮನೆಯ ಕಟ್ಟಿ ಆಡಿದೆವು
ಬಾಲಗಾನ ಮೇಳದೊ೦ದಿಗೆ ಹೋಗಿ ಎಲ್ಲೆಡೆ ಹಾಡಿನಲಿದೆವು

ವಾಣಿ ವಿಜ್ಜು ಉಡುಪಿ ಎಲ್ಲಾ ಕಡೆ ವರ್ಲ್ಡ್ ಫೇಮಸ್ಸು
ಮನೆಲಿ ಅಪ್ಪನ ಎದುರು ಮಾತ್ರ ಆಗ್ತಾ ಇದ್ರು ಟುಸ್ಸು
ವಾಣಿ ನನ್ನ ಪ್ರೀತಿಯ ದೊಡ್ಡಕ್ಕ ನಾ ನಿನ್ನ ಪ್ರೀತಿಯ ತಮ್ಮ
ವಿಜ್ಜು ನನ್ನ ಜಗಳದ ಪ್ರಿಯಗೆಳತಿ, ಸಿಟ್ಟು ಬ೦ದ್ರೆ ಇಬ್ರು ಗುಮ್ಮ

ಓ ನನ್ನ ಪ್ರೀತಿಯ ನೆಚ್ಚಿನ ಮುದ್ದಿನ ಅಕ್ಕ೦ದಿರೇ
ನನ್ನ ಕಾಲು ಜೀವನ ಕಾಪಾಡಿ ಸಲಹಿದ ಜೀವಗಳೇ
ನಿಮಗಿದೋ ನನ್ನ ಹೃದಯ ಪೂರ್ವಕ ಪ್ರೀತಿಯ ನಮನ
ಪ್ರೀತಿ ವಿಶ್ವಾಸದಲೇ ಕಳೆಯೋಣ ನಮ್ಮ ಉಳಿದ ಜೀವನ

-ಇತಿ ಪ್ರೀತಿಯ ತಮ್ಮ
ಸುಧಿ.